“Yangi oy”, II kitob
“YANGI OY”
(II kitob)
Kitob nomi: “Yangi oy”, II kitob
Janr: Roman, fentezi
Muallif: Stefani Mayer
Tarjimon: Dilfuza Sobirova
Bosmaxona: “Dizayn-Print”
Dunyo bo‘yicha millionlab nusxalarda nashr etilgan bestseller, filmlari ham katta ekranlarda muvaffaqiyat qozongan blokbaster – “Sumerki” romanlar seriyasining ikkinchi fasli “Yangi oy” nomi bilan “Dizayn-Print” bosmaxonasida chop etildi. Amerikalik yozuvchi ayol Stefani Mayerga olamshumul shon-shuhrat keltirgan mazkur asarning bosh qahramoni AQSHdagi kichik shaharchada yashovchi politsiya sherifining qizi Bella, ya'ni Izabella Svon. Asar o‘zbek tiliga tarjimon Dilfuza Sobirova tomonidan muvaffaqiyatli o‘girilgan.
“Sumerki” – zamonaviy vampirlar orasida yashaydigan oddiy qiz haqidagi buyuk saga. Uning ikkinchi kitobi bo‘lmish ushbu “Yangi oy” asari Bellaning tug‘ilgan kuni vampirlar oilasida nishonlanishi bilan boshlanadi. Zamonaviy vampirlar – odam go‘shtidan va qonidan parhez qilgan, oddiy insonlar bilan yonma-yon yashaydigan, shahardan qo‘nim topgan bezarar qonxo‘rlar edi. Ular vampirlikdan tashqari ko‘plab qobiliyatlarga ega bo‘lib, bu ularning o‘tmishda kim bo‘lganidan darak berardi. Odamning fikrini uqib olish, qorong‘i o‘rmonlarda eng yirtqich bo‘rilardek boshqa hayvonlarni ov qilish, inson bolasini olisdan sezish, ustasi farang poygachiligu ilm-fanni chuqur o‘zlashtirganlik, hech qachon so‘nmaydigan go‘zalligu kasallikka chalinmaslik – Bella hammasini bilardi. Biroq sirni politsiyachi otasidan yashirishga majbur edi. Vampirlar oilasidagi sevgilisi Edvard uchun Bella hamma narsaga tayyor edi. Edvard ham Bella uchun jonini fido qilishi mumkin. Hatto Bella vampirlar oilasiga kelin bo‘lish qasdida oddiy odamlikdan voz kechib, vampirga aylanish fikridan kechmagandi. Buning uchun Bellani vampirlar tishlashi va qiz ham vampirga aylanishi kerak...
Biroq shaharchada hindular ham istiqomat qilishardi. Faqat ulargina Kallenlar oilasi vampir ekanini bilishardi. Bella bilan do‘stlashgan Jeykob bir qarorga keladi: Bellani vampirlardan qutqarish lozim. Qizning muhabbati kelajakda halokatga olib kelishi muqarrar...
O‘qing! Stefani Mayerning “Yangi oy” kitobi! Fentezi janridagi bu asar o‘zbek kitobxonlarida ham katta qiziqish uyg‘otib, muhabbat va do‘stlik haqida qorong‘i o‘rmonlar ko‘lankasidagi qonxo‘rlar yonidagi qiz qismatidan hikoya qiladi! Nima deb o‘ylaysiz? Bellaning taqdiri qanday kechadi? Odamxo‘rlar halok qiladimi, vampirga aylanadimi yoki insoniylik g‘olib keladimi?
Barchasini kitobni o‘qiganda bilib olasiz!
