YANGI KITOB: Nabijon Hoshimov asari brayl yozuvida
YANGI KITOB: Nabijon Hoshimov asari brayl yozuvida
“Dizayn-Print” O‘ICHK MCHJ bosmaxonasining “Ijod-Press” nashriyot bo‘limida imkoniyati cheklangan ko‘zi ojizlar uchun barmoqda o‘qiladigan brayl kitoblar nashr etila boshlanganini avvalgi yangiliklarda ma'lum qilgan edik. Shvetsiya va Yaponiyada ishlab chiqarilgan uskunalarda sifatli brayl kitoblar nashr etilib, o‘quvchilar qo‘liga yetib bormoqda. Har bir kitob o‘rtacha 50-60 brayl varag‘idan iborat. Bunday kitoblarning qalinligi oddiy yozuvli kitoblarning bir nechtasiga teng, ya'ni ensiklopediyadek qalin. Ammo yumshoq kartonsifat qog‘ozlardan iborat bo‘lganligi sababli yengil va sifatli.
Dastlab rus tili va ingliz tili darsliklari nashr etilgan bo‘lsa, endilikda badiiy kitoblarga ham navbat keldi. Jumladan, yozuvchi Nabijon Hoshimovning “Ko‘zi ojiz oligarx” qissasi brayl yozuvida nashr etilish arafasida. Hozirda tahrir ishlari amalga oshirilmoqda. Ma'lumki, imkoniyat cheklangan ko‘zi ojiz kitobxonlar badiiy asarlardan brayl yozuvida va audioformatdagi kitoblar orqali bahramand bo‘lishadi. Bosma kitobning (qog‘oz kitobning) baribir o‘rni boshqacha.
Nabijon Hoshimovning “Ko‘zi ojiz oligarx” kitobi yurtimizda bo‘lib o‘tgan qiziqarli voqeaga asoslangan. Unda ko‘zi ojiz Bahrom aka kunlarning birida tadbirkorlik bilan shug‘ullanishga kirishadi va kutilmaganda katta muvaffaqiyatga erishadi. Biznesi nima edi? Bu hech kimning xayoliga kelmagan yangicha biznes bo‘lib, Rossiya va Yevropa gulxonalarini sifatli tabiiy o‘g‘it bilan ta'minlash edi. Hammasi bankdan kredit ololmay tushkunlikka tushgan kuni qizchasi qirga yetaklab borganidan boshlanadi. Bahrom aka dunyoi dunning bevafoligidan o‘ksinib qirda mahzun kayfiyatda o‘tiradi. Endi nima qiladi? Farzandlari ulg‘aymoqda. Ularni boqishi, o‘qitishi, uyli-joyli qilishi kerak. Qizchasi esa o‘yinqaroqlik qilib nari ketadi. Shunda tayanib o‘tirgan Bahrom akaning qo‘liga dumaloq narsa tegadi. Ushlab ko‘radi va nima ekanini qizchasidan so‘raydi...
Kitob oddiy yozuvda ham nashr etilgan. Barchasini kitobni mutolaa qilish mobaynida bilib olasiz.
Suratda: Nabijon Hoshimov ko‘zi ojizlarni yetaklovchi maxsus itlarni namoyish etayotgan rossiyalik mutaxassislar bilan. Yozuvchining qo‘lida oddiy yozuvda nashr etilgan “Ko‘zi ojiz oligarx” kitobi.
